Dende muit choven prencipia a suya andadura socio-politica en a capital d’o país aportando o suyo treballo a organizacions d’esfensa d’a luenga y cultura aragonesa, asociando-se en o Ligallo de Fablans de l’Aragónes u formando parte d’o centro social independentista A Espelunga. Posteriorment, en 1999, y coincidindo con os debatz en o seno de CHA ta l’articulación d’una corrient interna d’opinión que
mantenese as valors inicials soberanistas y socialistas d’a fundación, s’afilia a dito partiu integrando-se en Puyalón de Cuchas. Iste mesmo anyo ye trigau en Asamblea Nacional de CHA como miembro d’o Comité Nacional y d’o Consello (executiva). Poco tiempo dimpués prencipiará a militar tamién en a organización chovenil Chobenalla Aragonesista, estando trigau miembro d’a suya Maya Nacional, y aintro d’ella ye votau como o suyo Portavoz Nacional. Mientres istos anyos realiza un incansable treballo politico que le leva a formar parte de distintas candidaturas a Cortz d’Aragón. A crisi que sufre CHA en 2008, con a Expo como catalizador final y publico d’as importants esferencias organicas, tacticas y ideolochicas en o seno d’iste partiu, finaliza con a criminalización y expulsión de Chobenalla Aragonesista d’a
estructura de CHA. Ye allora quan forma parte d’a colla de personas que deciden de creyar o Bloque Independentista de Cuchas ya de raso desvinculau de CHA. En ista coordinadera de colectivos independentistas, s’integrará tamién Puyalón de Cuchas como organización politica autonoma. Dende istá nueva plataforma politica formará parte d’a candidatura a las eleccions europeas de 2009, Iniciativa Internacionalista – Cucha Independentista, y adedicará o suyo esfuerzo politico a la consolidación d’o Bloque Independentista de Cuchas y d’a organización politica Puyalón de Cuchas participando activament en a suya I y II asambleas nacionals