Una charrada con o grupo municipal de IU en Borja me feba venir a plego. Personas chovens, que i han conseguiu un concellero en a zaguera lechislatura. Personas concienciadas yeran veyendo como lo suyo lugar, declarau “Conjunto Histórico-Artístico” y “Bien de Interés Cultural” por o Gubierno de Aragón, se yera esboldregando debant d’os suyos uellos sin que ells podesen fer cosa. Lo curioso y preocupant d’ista situación, como en la de muitos lugars d’Aragón, ye que no se’n feban por ixo, nomás se’n feban por os biens de Sijena localizaus en Catalunya, por os que o suyo grupo en as Cortz, IU, heba sinyau con a resta de partius en 2/06/2006 una carta de compromís pa reclarmar-los y recuperar-los.

A situación en a que se troba o casco antiguo de Borja ye lamentable, dinantes punto de trobada d’os diferents barrios chodigos, musulmans y cristianos. Casas palaciegas, grans rafes decoraus, mudéjar,… un casco que en qualsiquier atro puesto d’Europa hese estau cudiau, y hese estau envidia de muitos atros lugars.

Dimpués d’as plevias d’iste hibierno y primavera, carreras han quedau talladas por peligro de desprendimientos. Dembas an que antes más bi heba casas en peligro d’esboldrar-se, s’han feito derruir y agora son emplegadas como aparcamiento pa autos en cuentas d’esviellar as casas. Arcos que s’esboldregoron fa bell par d’anyos como lo de Sant Bartolomé, han estau mal reconstruyius, a metat, y deixaus como un recosiro d’o que estió… no voi a centrar-me en a cantidat d’edificios, plazas (a plaza l’Olmo ye tot un desproposito de concentración d’edificios en peligro) y carreras en peligro.

No he preso en consideración pa tiste analís a chent de cierta, meya, edat,… adoctrinaus mientres muitos anyos en un espanyolismo conformista y buedo de critica. Pero, qué heba pasau en a conciencia d’istos zagals chovens, arroclaus en un prochecto como IU, pa aconortar-se con ista situación? Ni tan siquiera han conseguiu que o suyo grupo parlamentario en as Cortz levase ista problemática ta o parlamento? No imos a charrar de Madrit…

A vegadas, te trobas con comentarios dentro d’a izquierda aragonesa, tals como “qué mas nos da si somos aragonesistas, nacionalistas,…? nusatros somos ciudadanos d’o mundo”. Dentro d’ixe mensache, muit interiorizau, s’amaga un sentimiento de pertenecia a Espanya que lo chupe tot. Tanto como, plegar a priorizar ixe sentimiento de pertenencia y seguridat, a o de qüestionar o nulo emparo economico d’ixe Estau sobre o tuyo propio lugar. Un lugar que se ye esboldregando debant d’os tuyos uellos. S’imposa la critica a un pueblo chirmano como Catalunya, antis que no a critica a l’estau lamentable d’o tuyo lugar, nomás por salvaguardar a integridat de l’Estau espanyol.

Iste ye un debate de común evitar u negar dentro d’a izquierda en Aragón. Muitos d’os dreitos socials, laborals, culturals, de vertebración, transporte…se nos son negaus simplament por a nuestra condición de ciudadanos/as aragoneses/as. Encara que siempre bi habrá una sincusa que chustifique iste agravio, en pro de mantener a integridat d’Espanya.

Ye nomás un eixemplo en dentro d’o lamentable estau en que se troba Aragón, sin recursos pa mantener o suyo patrimonio, sin recursos pa plenar de cultura espacios esviellados, y con partius que s’estiman mas de derruir o patrimonio pa sacar-se un problema d’encima.

https://www.cortesaragon.es/Nota-de-prensa.712+M554d78e0c2a.0.html?&L=1