Aspira a estar un espacio de formación y debat que contribuiga a la transformación social, buscando a obridura de canals de participación politica a os sectors y clases oprimidas. Tiene como misión l’enfortimiento d’o soberanismo politico aragonés y contribuir a dotar a Aragón d’un prochecto social y nacional propio, incorporando a perspectiva de chenero. L’analís social, o debat, y a formación politica son a fin que guía a l’equipo de colaboradors y colaboradoras de Lagor.

Promueve l’analís d’o capitalismo y sociedat post colonial aportando ideyas pa la superación d’as desigualdatz y una transformación socioeconomica dende una optica que incorpore a qüestión de chenero y as valors feministas, de respecto a o meyo ambient, que tienga en cuenta os dreitos d’os animals, os dreitos socials y nacionals, a necesidat d’achugar por o decrecimiento y as nuevas sobiranías. En definitiva, abanzar enta una nueva economía dinamizada por un fuerte sector publico que armonice tot o sector productivo y s’empare en a economía social y solidaria d’o bien común que consolide as sobiranías nacional y popular y abance irreversible en a transformación social, politica, economica y cultural.

Prene o suyo nombre en memoria y homenache d’una revista d’opinión independentista editada por o decenio d’o 2000 en Zaragoza, y ye empentau por l’Instituto Aragonés pa la Transformación Social, que aspira a esdevenir en un centro d’estudios y opinión que promueva o desembolique d’o pensamiento soberanista y as valors progresistas, democraticas que aspiran a aconseguir una sociedat sin clases.